Një aksident i rëndë është regjistruar rreth orës 01:00 pas mesnate në “Sheshi Agjensia” në qytetin e Kukësit, ku një automjet tip “Benz” ka dalë nga rruga dhe është përplasur fillimisht me disa automjete të parkuara për t’u përfunduar disa metra më poshtë, pas humbjes së kontrollit.

Në automjet ndodheshin dy të rinj, një 22-vjeçar dhe një 17-vjeçar, të cilët mbetën të plagosur rëndë. Ata u dërguan fillimisht në spitalin rajonal të Kukësit, ku morën ndihmën e parë mjekësore, ndërsa më pas u transportuan për trajtim të specializuar.

Gjendja e 17-vjeçarit është e rënduar për shkak të një hemorragjie të brendshme në kokë dhe dëmtimeve të organeve të brendshme, dhe ai ndodhet aktualisht në kujdes intensiv në Spitalin e Traumës në Tiranë.

Policia ka nisur hetimet për zbardhjen e plotë të rrethanave, ndërsa paraprakisht dyshohet se shkak ka qenë shpejtësia e lartë dhe mungesa e kontrollit mbi mjetin.

Ky është aksidenti i dytë i rëndë brenda pak ditësh në qarkun e Kukësit, pasi vetëm dy ditë më parë humbën jetën dy persona në një aksident fatal në Has.