Indonezi – Ishujt turistikë të Indonezisë, Bali dhe Flores, u përballën me përmbytje të mëdha pas reshjeve më të dendura të viteve të fundit, duke shkaktuar të paktën 18 viktima dhe duke detyruar qindra banorë të braktisin shtëpitë.

Në Bali, humbën jetën të paktën 14 persona. Situata është kritike në kryeqytetin Denpasar, ndërsa zonat turistike si Canggu dhe Ubud janë përfshirë nga ujërat, me rrugë të shndërruara në lumenj. Dhjetëra makina u morën nga rrjedha e ujit. Më shumë se 560 banorë u evakuuan, duke u strehuar në shkolla dhe qendra komunitare. Përmbytjet shkaktuan gjithashtu kaos në qarkullimin drejt Aeroportit Ndërkombëtar i Gusti Ngurah Rai, ndërsa autoritetet paralajmëruan turistët të shmangin udhëtimet e panevojshme.

Në ishullin Flores, përmbytjet rrëmbyese në distriktin Nagekeo morën jetën e katër personave, përfshirë një foshnje gjashtë muajshe, dhe katër të tjerë rezultojnë ende të zhdukur.

Shërbimi Meteorologjik i Indonezisë (BMKG) njoftoi se reshjet ekstreme u shkaktuan nga valët Rossby ekuatoriale, të cilat nxisin formimin e reve të dendura dhe shira të pazakontë për këtë periudhë. Ekspertët paralajmërojnë se urbanizimi i shpejtë dhe sistemet e kanalizimeve të amortizuara, sidomos në Bali, rrisin rrezikun e përmbytjeve kur bien reshje jashtë sezonit tipik të munsoneve.

Indonezia përballet shpesh me përmbytje dhe rrëshqitje dheu gjatë sezonit të shirave, që kulmon nga nëntori deri në mars, por kjo ngjarje tregon pasojat e reshjeve të jashtëzakonshme jashtë periudhës normale.