Në Kosovë ka nisur këtë të shtunë zyrtarisht fushata zgjedhore për zgjedhjet lokale që do të mbahen më 12 tetor. Kandidatët për kryetarë komunash dhe për kuvendet lokale do të kenë në dispozicion disa javë për të prezantuar programet e tyre dhe për të bindur qytetarët që t’u japin votën.

Sipas Komisionit Qendror të Zgjedhjeve, të drejtë vote në këto zgjedhje kanë 2 milionë e 69 mijë e 98 qytetarë, prej të cilëve 43 mijë e 993 janë votues jashtë Kosovës. Ky grup do të mund të votojë me postë duke nisur nga 17 shtatori.

Në garë do të jenë gjithsej 5.626 kandidatë, mes tyre 206 për kryetarë komunash, ndërsa pjesa tjetër për ulëse në kuvendet komunale. Fushata pritet të jetë e fortë sidomos në kryeqytet, ku kreu aktual i Prishtinës, Përparim Rama nga LDK, kërkon një mandat të dytë, përballë kandidatit të Lëvizjes Vetëvendosje, Hajrulla Çeku.

Për këto zgjedhje, KQZ-ja ka certifikuar 93 subjekte politike: 32 parti, 32 iniciativa qytetare, 2 koalicione dhe 27 kandidatë të pavarur.

Zgjedhjet e fundit lokale në Kosovë u mbajtën në tetor të vitit 2021, ku fituesi më i madh ishte Partia Demokratike e Kosovës, e pasuar nga Lidhja Demokratike e Kosovës.