Pas lajmit për martesën e Genar Topallit, djalit të ish-kryeparlamentares dhe deputetes së Partisë Demokratike, Jozefina Topalli, me modelen dhe moderatoren sportive Cindy Marina, në rrjetet sociale janë publikuar pamjet e para nga ceremonia madhështore e mbajtur në Itali.
Në videot e shpërndara, shihen momente të mbushura me emocione, ku dhëndri vallëzon fillimisht me nusen e tij, e më pas me të ëmën. Një ndër klipet më të shpërndara tregon pikërisht momentin e kërcimit të Jozefina Topallit me të birin, duke emocionuar të pranishmit në ditën e tij më të veçantë.
Ceremonia, e organizuar në një prej ambienteve të Vatikanit, ka qenë private dhe e rezervuar, por pamjet e fundit hedhin dritë mbi atmosferën festive dhe elegancën që e karakterizoi.
Kjo ngjarje e rëndësishme familjare bëri që Jozefina Topalli të mungonte në seancën e parë të konstituimit të Kuvendit, ku deputetët e rinj bënë betimin, duke u renditur ndër pesë ligjvënësit që nuk ishin të pranishëm.
Nga ana tjetër, Cindy Marina, e njohur për titullin Miss Universe Albania 2019, karrierën e saj si sportiste dhe prezantuese televizive, kishte organizuar më herët një festë beqarie në SHBA, e cila gjithashtu u bë virale në rrjete sociale.
Dasma e çiftit ka tërhequr vëmendje të madhe jo vetëm për shkak të figurës publike të familjes Topalli, por edhe për shkak të profilit të lartë të Cindy Marinës, duke u kthyer në një nga eventet më të komentuara të javës në median rozë shqiptare.
