Besnik Koçiu, 52 vjeç, i arrestuar më 12 korrik 2025 për dyshime mbi një plagosje me armë sportive, ndërroi jetë vetëm pak ditë pas dërgimit në paraburgimin 313 në Tiranë.

Më 15 korrik, Gjykata e Tiranës caktoi për të masën e sigurisë “arrest me burg”, pavarësisht dokumentacionit mjekësor që tregonin se Koçiu vuante nga probleme serioze shëndetësore, përfshirë ishemi, diabet dhe pasoja nga një goditje në tru.

Familjarët e tij akuzojnë autoritetet se e mbajtën në izolim dhe nuk i siguruan ndihmën e nevojshme shëndetësore.

“Ka pasur shumë probleme. Nuk duhej të rrinte asnjë orë në paraburgim. E lanë aty dhe nuk morën asnjë masë. I kemi dorëzuar dokumentacionin, por nuk u mor parasysh,” tha motra e tij, Eranda Sejdini.

Edhe vëllai i të ndjerit, Maksim Koçiu, akuzoi gjykatën dhe stafin e burgut për neglizhencë:
“Nuk i dhanë asnjë ndihmë. Përgjegjësia fillon nga gjykata dhe vazhdon te ata që ishin kompetentë aty,” tha ai.

Familja ka depozituar një kallëzim penal në Prokurori, duke kërkuar hetim të plotë, hapjen e kamerave të paraburgimit dhe ndëshkimin e personave përgjegjës. “Ne nuk do të ndalemi pa gjetur të drejtën e vëllait. Duam kamerat, duam dosjen, duam përgjegjësi. Të dimë pse dhe si ndërroi jetë,” shtoi Maksim Koçiu.

Rasti ka hapur debate mbi trajtimin e të paraburgosurve me probleme të rënda shëndetësore dhe kërkesat për rishikim të procedurave në burgjet e vendit.