Tyler Robinson, 22 vjeç, i arrestuar si i dyshuari kryesor për vrasjen e aktivistit konservator Charlie Kirk, u kap duke bërë shaka dhe ironizuar rreth krimit në një bisedë private në Discord, vetëm disa orë pas ngjarjes tragjike.

Sipas mesazheve të siguruara nga The New York Times, Robinson diskutonte me ish-shokë klase dhe përdorues të tjerë të Discord-it për vrasjen, duke thënë se “sozia” e tij kishte shkrepur armën dhe duke bërë shaka për shpërblime monetare nga FBI-ja. Në asnjë moment nuk shfaqej pendim për veprën e kryer.

Ngjarja ndodhi të mërkurën në Universitetin e Luginës së Utah, ku Kirk, bashkëthemelues i Turning Point USA, po mbante një fjalim. Robinson u ngjit në çatinë e një ndërtese pranë vendit të ngjarjes dhe qëlloi një të shtënë fatale për Kirk, përpara se të largohej.

Mesazhet e zbuluara tregojnë një të ri që, ndërsa publikisht mediat raportonin për vdekjen e Kirk dhe politikanë si Presidenti Trump ngrenë homazhe kombëtare, talleshte në bisedat online, duke ironizuar për vdekjen dhe jetën e tij pas krimit. Një nga komentet e tij ishte: “Unë në fakt jam Charlie Kirk. Doja të largohesha nga politika, kështu që falsifikova vdekjen time.”

Robinson u dorëzua më vonë pranë autoriteteve, pas presionit të familjes së tij, në një distancë prej tre orësh me makinë nga kampusi ku ndodhi krimi. Prokurorët lokalë pritet të ngrejnë akuza për vrasje të rëndë dhe përdorim të armës së zjarrit në kryerjen e një krimi.