Një rast i pazakontë nga Cardiff po ngjall debat mbi sistemin britanik të drejtësisë. Leroy Douglas, sot 44 vjeç, ndodhet prej dy dekadash pas hekurave për një vjedhje telefoni celular, ndonëse dënimi fillestar i tij ishte vetëm dy vjet e gjysmë.

Në vitin 2005 ai u dënua sipas masës së diskutueshme “Prison for Public Protection” (Burgim për Mbrojtjen e Publikut), e cila lejonte mbajtjen e të burgosurve për një periudhë të pacaktuar, derisa bordi i lirimit të vendoste se ata nuk përbënin më rrezik. Edhe pse kjo masë u shfuqizua në vitin 2012, qindra të burgosur, përfshirë edhe Leroy, vijojnë të vuajnë pasojat e saj.

Familja e tij e përshkruan këtë si një “burgim të përjetshëm”. Babai, Anthony Douglas, 63 vjeç, kujton se i biri ishte një djalë i zakonshëm që bëri zgjedhje të gabuara gjatë rinisë, por kurrsesi nuk e meritonte një ndëshkim kaq drastik.

Leroy ka humbur vajzën e tij 20-vjeçare dhe gjyshërit gjatë këtyre viteve, ndërsa shëndeti i tij mendor është rënduar ndjeshëm. Zhvendosjet e shpeshta mes burgjeve e kanë penguar të përfundojë programet që kërkohen për shqyrtimin e lirimit me kusht.

Avokatë dhe aktivistë e cilësojnë këtë masë si drakoniane dhe të padrejtë, duke kërkuar që të gjithë të dënuarit sipas saj të rishikohen. Së fundmi, një peticion i dorëzuar në Doëning Street kërkoi shfuqizimin retrospektiv të këtyre vendimeve, duke e rikthyer rastin e Douglas në qendër të vëmendjes publike.