Vlora përballet me një situatë të paprecedentë në udhëheqjen e saj lokale. Sipas reagimit të ish-këshilltarit Gjergji Nika, ditën e Hënës do të vendoset në detyrë një nënkryetar i emëruar vetëm pesë ditë më parë, një veprim që sipas ligjit është i paligjshëm dhe cenon demokracinë vendore.

“Në këtë mënyrë po krijohet një skenar politik dhe ekonomik që synon kontrollin e tenderave, pronave publike dhe buxhetit të qytetit,” deklaron Nika. Ai thekson se ligji parashikon zhvillimin e zgjedhjeve brenda 45 ditësh, duke i dhënë qytetarëve të drejtën për të zgjedhur kryetarin e tyre. Çdo manovër tjetër, sipas tij, është shkelje e hapur e ligjit.

Gjergji Nika akuzon këshilltarët e majtë për mbështetje të vendimeve që, sipas tij, degradon ligjshmërinë, transparencën dhe moralin politik: “Dega lokale e Partisë Socialiste dhe këshilltarët e saj nuk po përfaqësojnë qytetarët, por interesa të ngushta politike e ekonomike,” shprehet Nika.

Ai përfundon me një thirrje të qartë: Vlora ka nevojë për zgjedhje të lira dhe një kryetar të zgjedhur nga qytetarët, që të sjellë transparencë, moral dhe zhvillim për qytetin.

✊ Reagimi është bërë publik nga Gjergji Nika, anetar I këshillit bashkiak ne Vlorë.