Milano, Itali – Autoritetet italiane kanë arrestuar tre persona të dyshuar për vrasjen brutale të 62-vjeçarit turk Hayati Aroyo, i cili u gjet i karbonizuar më 23 korrik në një apartament në Sesto San Giovanni, pranë Milanos.

Sipas hetimeve, një burrë italian, një grua italiane dhe një shtetas shqiptar goditën viktimën me thikë rreth 30 herë dhe më pas tentuan të fshinin gjurmët duke i vënë flakën trupit dhe banesës. Hetuesit arritën të rindërtonin lëvizjet e autorëve përmes kamerave të sigurisë, analizës së të dhënave telefonike dhe përgjimeve.

Shqiptari dhe italiani u dërguan në burgun Busto Arsizio, ndërsa gruaja në burgun e Milanos, në pritje të vendimit për masën e sigurisë. Viktima ishte kunati i një figure të njohur të mafias turke, Huseyin Sarai, por hetimet konfirmuan se vrasja nuk kishte lidhje me aktivitetet kriminale të familjes.

Identiteti i Aroyos u konfirmua përmes gjurmëve të gishtërinjve, ndërsa apartamenti ku ndodhi krimi ishte marrë me qira nga një student që ndodhej jashtë vendit. Ngjarja ka tronditur komunitetin lokal dhe ka shtuar shqetësime për sigurinë në zonë.