Kryeministri i Shqipërisë, Edi Rama, ka komentuar proceset gjyqësore që po zhvillohen në Dhomat e Specializuara të Kosovës në Hagë, ku po gjykohen ish-drejtues të Ushtrisë Çlirimtare të Kosovës.

Përmes një postimi në rrjetet sociale, Rama shpërndau një video nga një seancë gjyqësore, ku një dëshmitar, Agim Idrizi, rrëfen ngjarje të karakterit të zakonshëm gjatë kohës së luftës, si vjedhja e druve apo zhdukja e bagëtive.

Krahas videos, kryeministri shkroi:

“Ej medet vajmedet drejtësia ndërkombëtare për krime kundër njerëzimit…”

Në dëshminë e tij, Idrizi përmend episode që nuk lidhen drejtpërdrejt me akuzat kryesore ndaj të pandehurve, duke thënë se:

“Po u kanë puna për dy kuaj dru. I kam vjedhë në mal… Këta i kanë vjedhë lopët në Komunë të Kaçanikut, hupshin lopët pa shenjë. Edhe mua ma kanë vjedhë mëzatin e një lopë.”

Ndërkohë, sot ka përfunduar ditën e parë të dëshmisë në Hagë ish-diplomati britanik John Stewart Duncan, i thirrur nga mbrojtja e ish-presidentit të Kosovës, Hashim Thaçi. Në ditët e fundit kanë dëshmuar edhe ish-zyrtarë të lartë ndërkombëtarë, si James Rubin, ish-ndihmëssekretar i Shtetit në SHBA, dhe Paul Williams, këshilltar ligjor i delegacionit të Kosovës në Rambuje.

Procesi i paraqitjes së provave të mbrojtjes ka nisur më 15 shtator dhe pritet të zgjasë deri në mesin e nëntorit. Sipas afateve të vendosura nga gjykata, ekipet mbrojtëse duhet të dorëzojnë shkresat përfundimtare deri më 22 dhjetor 2025.

Ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, ndodhen në paraburgim në Hagë prej nëntorit të vitit 2020, të akuzuar për krime të pretenduara lufte.