Nju Jork, 23 shtator – Shërbimi Sekret amerikan ka zbuluar dhe çmontuar një rrjet të madh pajisjesh elektronike në rajonin metropolitan të Nju Jorkut, duke e cilësuar si një kërcënim të menjëhershëm për udhëheqësit politikë që marrin pjesë në Asamblenë e Përgjithshme të Kombeve të Bashkuara.
Sipas deklaratës zyrtare, agjentët gjetën 300 servera SIM dhe rreth 100 mijë karta SIM të shpërndara në disa lokacione. Hetimet paraprake sugjerojnë se pajisjet përdoreshin për komunikime celulare ndërmjet aktorëve të huaj shtetërorë dhe individëve të njohur për autoritetet federale.
“Pajisjet mund të lehtësonin thirrje anonime kërcënuese dhe gjithashtu të nxirrnin jashtë funksionit antenat e telekomunikacionit përmes mbingarkimit të tyre. Kriminelët do të kishin qenë në gjendje të kryenin edhe komunikime të koduara”, tha Shërbimi Sekret.
Njoftimi u bë publik pak orë përpara fjalimit të Presidentit Donald Trump në Asamblenë e Përgjithshme të OKB-së, duke shtuar tensionin për sigurinë e ngjarjes.
Drejtori i Shërbimit Sekret, Sean Curran, paralajmëroi se rrjeti kishte potencial të ndërpriste komunikimet kombëtare:
“Potenciali për ndërprerje të telekomunikacionit të vendit tonë që vinte nga ky rrjet pajisjesh nuk mund të mbivlerësohet. Misioni ynë është parandalimi, dhe ky operacion ua bën të qartë aktorëve keqbërës se kërcënimet e menjëhershme ndaj personave tanë të mbrojtur do të çmontohen pa vonesë.”
Hetimet po vazhdojnë, ndërsa agjencia nuk ka dhënë ende detaje mbi origjinën e mundshme të këtij rrjeti të sofistikuar.
