Një burrë rreth të 40-ave është arrestuar nga Agjencia Kombëtare e Krimit (NCA) në Mbretërinë e Bashkuar, në lidhje me sulmin kibernetik që fundjavën e kaluar goditi Aeroportin Heathrow dhe aeroporte të tjera të mëdha evropiane.
Arrestimi u krye të martën në West Sussex, ndërsa i dyshuari u akuzua për shkelje të Aktit të Keqpërdorimit të Kompjuterëve. Ai është liruar me kusht, në pritje të vijimit të hetimeve.
Sulmi kishte si objektiv Collins Aerospace, duke shkaktuar probleme në sistemet e regjistrimit dhe hipjes në bord. Pasoja e menjëhershme ishin vonesa të shumta fluturimesh në aeroportet e Heathrow, Brukselit dhe Berlinit.
Zëvendësdrejtori i NCA-së, Paul Foster, tha se arrestimi është një hap i rëndësishëm, por hetimet janë ende në fazë të hershme:
“Krimi kibernetik mbetet një kërcënim global që shkakton ndërprerje të mëdha në Mbretërinë e Bashkuar. Së bashku me partnerët vendas dhe ndërkombëtarë, jemi të angazhuar për ta luftuar dhe për të mbrojtur publikun britanik.”
Autoritetet britanike po punojnë për të zbardhur rrethanat e sulmit dhe shkallën e përfshirjes së 40-vjeçarit në këtë ngjarje që tronditi udhëtimin ajror në disa prej qendrave më të mëdha evropiane.
