Një ngjarje e rëndë është regjistruar në orët e para të mëngjesit të sotëm në burgun e Fierit, ku një i burgosur tentoi të arratisej duke çarë murin e qelisë.

Protagonist i tentativës është 43-vjeçari Bledar Selmanaj, i cili ndodhet në paraburgim dhe për të cilin prokuroria ka kërkuar burgim të përjetshëm për vrasjen e 25-vjeçarit Xhuljano Bullari, ngjarje e ndodhur më 21 gusht 2021 në Vlorë.

Burime konfirmojnë se Selmanaj kishte arritur të dëmtonte murin e qelisë dhe të dilte deri në tarracën e institucionit, ku u kap nga forcat e sigurisë gjatë ndërrimit të turnit.

Mjetet e përdorura për të çarë murin ende nuk janë zbuluar, ndërsa Drejtoria e Burgut të Fierit nuk ka dhënë deri tani një reagim zyrtar për incidentin.

Ngjarja ka ngritur pikëpyetje mbi masat e sigurisë në burg dhe pritet që hetimet të përcaktojnë nëse Selmanaj ka vepruar i vetëm apo ka patur ndihmës brenda institucionit.