Sarandë – Gjykata e Sarandës ka dënuar me 3 vjet e 4 muaj burg shoferin e transportit ndërkombëtar Sarandë–Athinë, Vasillaq Vasili, 52 vjeç, i cili u kap një vit më parë me një sasi të vogël kokainë në pikën kufitare të Qafë-Botës.

Vendimi është shpallur më 23 shtator, ndërsa i pandehuri ndodhej në paraburgim që prej 18 nëntorit 2024.

Kapja në kufi

Sipas dosjes hetimore, rreth orës 19:00 të ditës së arrestimit, Vasili u kontrollua nga policia kufitare teksa drejtonte një furgon “Mercedes Benz” me targa AB643LM. Gjatë kontrollit, në një çantë tip marsup që kishte me vete, u gjetën 6 doza të mbështjella me lëndë pluhuri të bardhë, të dyshuar si kokainë, si dhe një peshore elektronike.

Nga peshimi, sasia totale rezultoi 3.83 gramë me ambalazh, ndërsa pas analizës laboratorike u vërtetua se bëhej fjalë për 3.329 gramë kokainë.

Në banesën e tij nuk u gjetën sende të jashtëligjshme.

Deklarimet e shoferit

Gjatë marrjes në pyetje, Vasili pranoi se ishte përdorues i kokainës prej shumë vitesh. Ai tha se dozat i kishte blerë në Athinë kundrejt shumës prej 80 euro, pasi çmimi në Shqipëri ishte më i lartë.

“Këtë sasi e konsumoj për një periudhë 12-ditore, në varësi të gjendjes psikologjike. Peshorja që u gjet në çantën time nuk është e imja, por është harruar nga personi që ma ka shitur,” – ka deklaruar ai para hetuesve.

Analizat toksikologjike konfirmuan praninë e metabolitëve të kokainës në organizmin e tij. Megjithatë, ekspertiza e celularit të shoferit nuk nxori të dhëna që të sugjeronin përfshirjen në shpërndarje.

Vendimi i gjykatës

Pavarësisht pretendimeve, Gjykata e Sarandës e deklaroi fajtor për veprën penale të “prodhimit dhe shitjes së lëndëve narkotike” dhe e dënoi fillimisht me 5 vjet burg.

Në aplikim të gjykimit të shkurtuar, dënimi iu ul në 3 vjet e 4 muaj, të cilin 52-vjeçari do ta vuajë në një burg të sigurisë së zakonshme.