Pas shpalljes së vendimit të gjykatës amerikane, që dënoi Sean “Diddy” Combs me 4 vite e 2 muaj burg dhe një gjobë prej 500 mijë dollarësh, ka ardhur edhe reagimi i Cassie Ventura-s.

Përmes avokatit të saj, Doug Wigdor, këngëtarja dhe modelja u shpreh se dënimi njeh peshën e veprave të rënda të ish-partnerit të saj.

“Teksa asgjë s’mund ta zhbëjë traumën e shkaktuar nga (Sean ‘Diddy’) Combs, dënimi i caktuar sot njeh impaktin e veprave të rënda që ai ka kryer. Ne kemi besim se me mbështetjen e familjes dhe miqve të saj, Ventura do të vazhdojë të shërohet, duke e ditur se guximi dhe kurajoja e saj kanë frymëzuar shumë njerëz”, thuhet në deklaratë.

Procesi ligjor nisi në nëntor 2023, kur Cassie ngriti padinë e saj ndaj reperit. Megjithëse juria nuk e shpalli fajtor për trafikim seksual, gjykata e shpalli përgjegjës për transportim me qëllim prostitucionin.

Sipas avokatit, duke folur hapur për përvojën e saj, Cassie “ka lënë një gjurmë të pashlyeshme në industrinë e argëtimit dhe në betejën për drejtësi”.

“Ajo shpalosi forcë të pakundërshtueshme dhe drejtoi vëmendjen te realiteti i burrave të pushtetshëm që për dekada kanë vepruar pa pengesa. Kjo çështje tregoi se ndryshimi duhej bërë prej kohësh, dhe ne do të vazhdojmë betejën në mbrojtje të të mbijetuarave,” shtoi Wigdor.

Nga ana tjetër, avokatët e Combs konfirmuan se do ta apelojnë vendimin brenda afatit ligjor 14-ditor.