Kungulli është një nga simbolët e vjeshtës dhe një nga perimet më të dashura për shijen dhe vlerat e tij ushqyese. I pasur me vitamina, minerale dhe fibra, ai ka shumë pak kalori dhe mund të përdoret në kuzhinë në forma të shumta – nga supat dhe sallatat, tek ëmbëlsirat, kompostot dhe deri te gatimet e brumit.
Jo vetëm fruti, por edhe farat, gjethet dhe lëngu i kungullit kanë vlera të mëdha shëndetësore, duke e bërë këtë perime një pjesë të çmuar të dietës sonë.
Pse kungulli është i dobishëm për shëndetin?
• Për sytë dhe imunitetin – I pasur me vitaminë A, një racion kungulli ofron mbi 200% të dozës ditore të rekomanduar. Ai ndihmon në përmirësimin e shikimit dhe forcon sistemin imunitar.
• Shëndeti i zemrës – Kaliumi dhe antioksidantët e kungullit kontribuojnë në uljen e rrezikut për sëmundje kardiovaskulare dhe disa lloje kanceri.
• Kolesteroli – Farat e kungullit përmbajnë sterolë bimorë dhe omega-3, të cilat ndihmojnë në uljen e kolesterolit të keq dhe triglicerideve, duke mbajtur nën kontroll tensionin e gjakut.
• Menaxhimi i peshës – Me vetëm 50 kalori për racion dhe 3 gramë fibër, kungulli është ideal për t’u ndier i ngopur më gjatë, pa e tepruar me kaloritë.
Si ta përfshini kungullin në dietën tuaj të përditshme?
• Piqeni në furrë dhe shërbejeni si antipastë ose garniturë.
• Përgatisni pure kungulli për të trashur supat apo për të zëvendësuar yndyrat në gatime.
• Përdoreni në brumë dhe ëmbëlsira si alternativë më të shëndetshme ndaj gjalpit.
• Kombinojeni me kos dhe mjaltë për një recetë të shëndetshme dhe të shijshme.
• Përziejeni në lëngje frutash ose smoothie për një shtesë të pasur me fibra dhe vitamina.
• Farat e kungullit piqini lehtë dhe përdorini në sallata ose me perime të pjekura.
Ruajtja
Kungujt e paprerë mund të qëndrojnë deri në 2 muaj në një vend të freskët dhe të errët, duke ju dhënë mundësinë ta shijoni këtë superperime gjatë gjithë sezonit.
