Një ngjarje e rëndë tronditi zonën turistike të Finikundas në Mesini, Greqi, mbrëmjen e 5 tetorit, ku dy persona – një shtetas grek rreth 70 vjeç dhe një shqiptar rreth 60 vjeç – u qëlluan për vdekje në ambientet e një kampingu.

Autoritetet greke raportojnë se ngjarja ndodhi rreth orës 20:30, kur një i ri me fytyrë të mbuluar hyri në recepsionin e kampingut dhe qëlloi fillimisht pronarin grek, më pas edhe përgjegjësin shqiptar të mirëmbajtjes, ndërsa ky i fundit tentoi të largohej. Pas krimit, autori dyshohet se u largua me motor.

Burime policore bëjnë me dije se autoritetet po hetojnë lidhjet mes autorit dhe viktimave, pasi dyshohet se ata njiheshin më parë. Detaje të mëparshme tregojnë se pronari grek kishte raportuar për një tentativë atentati rreth 15-20 ditë më parë dhe kishte pësuar plagë në një përplasje të mëparshme gjatë verës.

Hetimet po vijojnë nga Njësia për Hetimin e Krimeve të Rënda të Mesinisë, ndërsa autoritetet po mbledhin prova për kapjen e autorit dhe zbardhjen e plotë të ngjarjes.