Presidenti i Republikës, Bajram Begaj, mori pjesë në ceremoninë e hapjes së vitit të ri akademik në Universitetin “Aleksandër Moisiu” në Durrës, duke uruar studentët dhe pedagogët.

Në fjalën e tij, Begaj theksoi rëndësinë e përshtatjes së arsimit të lartë me ndryshimet teknologjike dhe rolin e tij në ndërtimin e një Shqipërie më të drejtë dhe të zhvilluar. Ai nënvizoi se studimet universitare nuk duhet të jenë thjesht një diplomë, por mundësi për dije, përkushtim dhe përgjegjësi.

“Arsimi i lartë nuk është vetëm një derë drejt një profesioni, por çelësi për të kuptuar botën dhe për të gjetur zgjidhje për sfidat e së ardhmes,” u shpreh Begaj, duke inkurajuar pedagogët të ofrojnë arsim cilësor dhe studentët të investojnë dijet e tyre për të qenë udhëheqësit e së nesërmes.