Dy persona janë arrestuar pas ngjarjes së rëndë që tronditi ditën e sotme Tiranën, ku gjyqtari Astrit Kalaja u vra me armë zjarri brenda Gjykatës së Apelit të Juridiksionit të Përgjithshëm.

Në pranga kanë rënë autori i dyshuar i vrasjes, Elvis Shkambi, si dhe xhaxhai i tij, Gjon Shkambi, të cilët janë dërguar në Drejtoria e Policisë së Tiranës për t’u marrë në pyetje.

Sipas hetimeve paraprake, krimi ndodhi menjëherë pas përfundimit të një seance gjyqësore për një çështje pronësie në Shkodër, ku gjyqtari Kalaja kishte dhënë vendim kundër Shkambëve.

Në momentin e shpalljes së vendimit, Elvis Shkambi ka nxjerrë armën dhe ka qëlluar tre herë ndaj gjyqtarit, duke e plagosur për vdekje, ndërsa janë lënduar edhe dy persona të tjerë, babë e bir – Rakip dhe Ervis Kurtaj, palë në procesin gjyqësor.

Të plagosurit ndodhen në Spitalin e Traumës, jashtë rrezikut për jetën.
Ndërkohë, policia po vijon hetimet për zbardhjen e plotë të motivit të ngjarjes dhe mënyrës se si arma u fut në ambientet e gjykatës.

Ngjarja ka shkaktuar tronditje të madhe në sistemin e drejtësisë, ndërsa prokuroria ka nisur procedimin penal për “vrasje me paramendim” dhe “armëmbajtje pa leje”.