Ditën e sotme në Kuvend po zhvillohen disa mbledhje të rëndësishme, mes tyre ajo e Konferencës së Kryetarëve, e cila nisi në orën 09:00. Në rend dite është përfshirë kërkesa e një grupi deputetësh të Partisë Demokratike për mocion me debat dhe ngritjen e një komisioni të posaçëm mbi gjetjet e OLAF në lidhje me fondet e programit IPARD.

Gjatë Konferencës, deputeti demokrat Agron Gjekmarkaj ka reaguar ashpër ndaj një shkrese të Kuvendit, sipas së cilës gjatë muajit tetor do të nderohen figura dhe personalitete të ndryshme — mes tyre edhe ish-diktatori Enver Hoxha.

Në fjalën e tij, Gjekmarkaj akuzoi mazhorancën për rehabilitimin e një figure që simbolizon diktaturën komuniste, duke e cilësuar një akt fyes për kujtesën historike dhe viktimat e regjimit.

“Ju duhet të mbani përgjegjësi morale për futjen e figurës së Enver Hoxhës në analet e Kuvendit të Shqipërisë. Po kujtoj këtu atë që ka thënë Dritëro Agolli: Partia Socialiste ka lindur nga mitra e përgjakur e Partisë së Punës,” — deklaroi Gjekmarkaj.

Deputeti demokrat shtoi se në grupin parlamentar të Partisë Socialiste ka individë që kanë shërbyer si hetues gjatë regjimit komunist, ndërsa theksoi se një akt i tillë është “fyerje për besimin e shqiptarëve në falje, por jo në harresë”.

Konferenca e Kryetarëve po zhvillohet me dyer të mbyllura, ndërsa paralelisht gjatë ditës janë parashikuar të mblidhen gjashtë komisione parlamentare, që pritet të diskutojnë çështje të rëndësishme në prag të sesionit vjeshtor parlamentar.