Në Konferencën e Kryetarëve që po zhvillohet sot në Kuvend, Sekretari i Përgjithshëm i Partisë së Lirisë, Tedi Blushi, ka kërkuar që në seancën plenare të së enjtes të zhvillohet një debat urgjent për gjendjen alarmante të sigurisë së jetës në vend.

Kërkesa e tij vjen pas ngjarjes së rëndë në Gjykatën e Apelit, ku gjyqtari Astrit Kalaja u vra brenda sallës së gjyqit, ndërsa u plagosën edhe dy persona të tjerë.

Blushi e cilësoi këtë ngjarje “një akt terrorist” dhe një sinjal alarmi për rendin dhe sigurinë publike në Shqipëri, duke theksuar se Kuvendi nuk mund të kufizohet në procedura formale ndërkohë që qytetarët ndihen të pambrojtur.

“Kuvendi nuk mund të mblidhet vetëm për të miratuar procesverbale. Akti terrorist i ekzekutimit të gjyqtarit Astrit Kalaja është alarm kombëtar për sigurinë e jetës. Kjo duhet të jetë tema kryesore e diskutimeve,” – u shpreh Blushi.

Ai shtoi se vrasja e gjyqtarit ka tronditur ndërgjegjen kombëtare, duke akuzuar institucionet për mungesë reagimi dhe masa konkrete:

“Krimi ka marrë yrysh, shqiptarët janë më të pasigurtë se kurrë. Sot çdo qytetar ndihet i kërcënuar nga krimi i organizuar dhe ai ordiner. Është e turpshme që KLGJ flet për sigurinë e gjyqtarëve vetëm pasi ndodhi tragjedia.”

Sipas Blushit, Kuvendi duhet të shndërrohet në një arenë debati për hallet dhe frikërat e qytetarëve, jo në një institucion që merret vetëm me miratimin e dokumenteve formale.

“Të mblidhemi për shqiptarët dhe jetën e tyre, jo për procesverbale. Siguria e jetës është sot çështja më urgjente për kombin,” – përfundoi ai.