Kryetari i Grupit Parlamentar të Partisë Socialiste, Taulant Balla, ka kërkuar që në seancën plenare të ditës së nesërme në Kuvendin e Shqipërisë të mbahet një minutë heshtje në nder të gjyqtarit të ndjerë Astrit Kalaja, i cili u vra dy ditë më parë gjatë një seance gjyqësore në Gjykatën e Apelit.

Gjyqtari Kalaja mbeti i vrarë pas një atentati me armë zjarri në sallën e gjyqit, teksa po shpallte vendimin për një çështje pronësie. Ngjarja tronditi mbarë opinionin publik, duke rikthyer në qendër të vëmendjes çështjen e sigurisë në institucionet e drejtësisë.

Ndërkohë, sot janë zhvilluar homazhe në nder të tij, ku kanë marrë pjesë figura të larta të drejtësisë dhe politikës, përfshirë Kryeministrin Edi Rama dhe Ministrin e Drejtësisë Besfort Lamallari.

Trupi i pajetë i gjyqtarit Astrit Kalaja do të prehet në vendlindjen e tij, në Shkodër, ku familjarë, miq dhe kolegë do t’i japin lamtumirën e fundit një prej figurave të njohura të sistemit gjyqësor shqiptar.