Presidenti i Shteteve të Bashkuara, Donald Trump, deklaroi në një intervistë për Fox News se pengjet e mbajtura në Gaza pritet të lirohen të hënën, si pjesë e fazës së parë të marrëveshjes së armëpushimit mes Izraelit dhe Hamasit.

“Pengjet do të lirohen. Tani për tani, po ndodhin shumë gjëra me lirimin e pengjeve dhe ne besojmë se të gjithë do të kthehen në Izrael të hënën, përfshirë edhe trupat e të vdekurve,” – tha Trump.

Presidenti shtoi se SHBA do të marrë pjesë aktive në procesin e rindërtimit të Gazës, duke theksuar:

“Ne do të marrim pjesë në çdo proces për të pasur sukses dhe për të ruajtur paqen.”

Deklarata e Trump vjen pak orë pasi ai njoftoi zyrtarisht marrëveshjen mes palëve, që parashikon shkëmbimin e pengjeve me të burgosur dhe tërheqjen graduale të trupave izraelite nga Rripi i Gazës.

Nga ana tjetër, ushtria izraelite njoftoi se Shefi i Forcave të Armatosura, Gjenerali Eyal Zamir, ka urdhëruar gjendje gatishmërie të lartë operative për procesin e kthimit të pengjeve.
Sipas njoftimit, Zamir kërkoi që operacioni të kryhet “me ndjeshmëri dhe profesionalizëm”, duke paralajmëruar se trupat duhet të jenë të përgatitura për çdo skenar të mundshëm gjatë zbatimit të marrëveshjes.