Ushtria izraelite ka njoftuar se po zhvillon një “protokoll të ri luftimi” dhe po bën përgatitjet për kalimin në linjat e përshtatura të vendosjes, në prag të zbatimit të marrëveshjes së paqes me Hamasin në Rripin e Gazës.

“Sipas këtij procesi, po bëhen përgatitjet për të kaluar së shpejti në linjat e përshtatura të vendosjes”, thuhet në deklaratën zyrtare të ushtrisë.

Nëse faza e parë e marrëveshjes miratohet nga qeveria izraelite në mbledhjen e planifikuar për sot, armëpushimi do të hyjë në fuqi menjëherë, ndërsa trupat izraelite do të tërhiqen në vijën e rënë dakord mes palëve.

Marrëveshja, e ndërmjetësuar nga Shtetet e Bashkuara, pritet të shënojë fundin e dy viteve të përgjakshme lufte, duke përfshirë lirimin e pengjeve dhe nisjen e procesit të rindërtimit të Gazës.

Burime pranë ushtrisë izraelite thanë se operacionet për zbatimin e marrëveshjes do të zhvillohen me “kujdes, profesionalizëm dhe gatishmëri të lartë operative”, për të garantuar sigurinë dhe respektimin e kushteve të armëpushimit.