Kremlini ka akuzuar zyrtarisht udhëheqjen ukrainase për ndërprerjen e procesit të negociatave të zhvilluara në Stamboll, që synonin gjetjen e një zgjidhjeje paqësore për konfliktin mes Rusisë dhe Ukrainës.

“Negociatat në Stamboll janë pezulluar për shkak të mosgatishmërisë së Kievit për t’iu përgjigjur pyetjeve që kemi bërë,” deklaroi zëdhënësi i Kremlinit, Dmitry Peskov, gjatë një interviste për gazetarin rus Pavel Sarubin, i njohur për afërsinë e tij me strukturat shtetërore në Moskë.

Sipas Peskov, pala ukrainase nuk i është përgjigjur një draft-dokumenti që përfshinte ngritjen e tre grupeve të punës për diskutimin e kushteve të mundshme të marrëveshjes. Ai theksoi se Moska kishte qenë fillimisht optimiste për frymën e bashkëpunimit pas samitit të mbajtur në Anchorage të Alaskës midis presidentit rus Vladimir Putin dhe presidentit amerikan Donald Trump në gusht, megjithëse takimi nuk solli rezultate konkrete për përfundimin e luftës.

“Kievi nuk po kontribuon pozitivisht në proces, por ne shpresojmë që presidenti Trump do të ruajë vullnetin politik për të çuar përpara një zgjidhje paqësore,” shtoi zëdhënësi i Kremlinit.

Rusia ka nisur pushtimin e plotë të Ukrainës më shumë se tre vjet e gjysmë më parë, dhe që prej atëherë, delegacionet e të dy vendeve janë takuar disa herë në Stamboll për negociata të drejtpërdrejta. Deri më tani, palët kanë arritur vetëm marrëveshje të pjesshme për shkëmbime të të burgosurve dhe trupave të ushtarëve, ndërsa nuk ka ende shenja për një marrëveshje përfundimtare të paqes në horizont.