Sekretari i Partisë Demokratike për çështjet ligjore Çlirim Gjata ka reaguar lidhur me operacionet dhe arrestimet e fundit të SPAK ndaj zyrtarëve të shtetit.
Në një prononcim për mediat, Gjata tha se çdo abuzim ndodh me lejen e shefave të mëdhenj, ndërsa shtoi se është habi që ish-ministri Sandër Lleshaj nuk ishte në dijeni për tenderin e uniformave.
Gjata inkurajon punën e Prokurorisë së Posaçme por shton se ky institucion nuk mund të justifikohet duke kapur “peshqit e vegjël” të cilët korruptohen me peshq. Ai shton se SPAK duhet të shkojë më tej se sa arrestimi i një kryetari bashkie apo punonjësve të ministrisë dhe të kapë peshqit e mëdhenj.
“Çështja në fjalë është e vjetër, që e kam bërë një deklarim për një abuzim me fondin e ish-parkut olimpik. Bëhet fjalë për 800 mijë euro. Pavarësisht se ndodhemi në gjyq për shpifje, këtu duhet të dimë se çfarë po ndodh. Kur doli tenderi për Uniformat e Policisë, Lleshaj paditi PD-në. Që SPAK bëri arrestimin e 9 zyrtarëve, Lleshaj doli dhe tha se nuk ishte në dijeni. Por si mund të mos ishte në dijeni kur shkoi dhe paditi PD-në. Si ka mundësi që nuk di gjë as ministri, as zv.ministri apo dhe zyrtarët? Ne po i kërkojmë kësaj prokurorie që duhet të shoh më seriozisht dhe të hyjë më thellë brenda unazës së Tiranës, në institucionet për të rëndësishme.
“SPAK-u për të gjithë këtë që u bë në drejtësi nuk mund të justifikohet duke kapur një peshk që është korruptuar me peshk. Duhet të shkohet përtej kësaj, nuk jemi kundër këtyre, e inkurajojmë. Të shkohet aty ku ndërkombëtarët i kanë quajtur peshqit e mëdhenj. Nuk mund të rrish në nivelin e një kryetari bashkie dhe një ish-zv ministre që ka marrë 2 mijë euro dhe të thuash kaq ishte korrupsioni. Kaq ka qenë korrupsioni në Shqipëri, një kanal andej, uniformat e policisë. Korrupsioni në Shqipëri është më i thellë se kaq. SPAK nuk është askund me këto çështje të vogla, misioni i tij është më i madh. Nuk justifikohen dot duke thënë nuk dinim gjë. Nuk mund të vish përpara SPAK-ut. Problemin me SPAK-un nuk e zgjidh dot faktin që shkojnë këta dhe thonë jemi të pastër, skemi firmosur gjë,- tha Gjata.
