Shefja e Komisionit Evropian, Ursula von der Leyen, do të qëndrojë sot në Kosovë, në kuadër të turneut të saj në Ballkanin Perëndimor. Ajo pritet të zhvillojë takime të ndara me presidenten Vjosa Osmani dhe kryeministrin në detyrë, Albin Kurti.

Vizita e von der Leyen nis në orën 13:00 në Presidencë, ku do të takohet me Osmanin, ndërsa në orën 14:05 do të pritet nga Kurti në ndërtesën e Kuvendit të Kosovës. Nuk është paralajmëruar ndonjë deklaratë për media pas takimeve.

Vizita e saj vjen në një moment të ndjeshëm për Kosovën, e cila ndodhet me një qeveri në detyrë që nga zgjedhjet e 9 shkurtit. Kryeministri Kurti ka afat deri më 26 tetor për të formuar kabinetin e ri, ndërsa për krijimin e shumicës i nevojiten 61 vota. Sipas BE-së, deri në krijimin e një qeverie me mandat të plotë, zyrtarët evropianë kanë kufizuar takimet në ndërtesat qeveritare.

Kjo është vizita e parë e von der Leyen në Kosovë pas një viti.