Një studim i fundit ka ngritur shqetësim mbi një lidhje të mundshme mes konsumit të tepërt të pijeve të ëmbla dhe rënies së flokëve, veçanërisht tek burrat.

Sipas kërkuesve nga Universidade do Porto në Portugali, mënyra e ushqyerjes ndikon drejtpërdrejt në shëndetin e flokëve. “Dieta dhe ushqimi luajnë rol vendimtar, sidomos plotësimi me vitaminë D dhe hekur, ndërsa kufizimi i alkoolit dhe pijeve të gazuara mund të jetë i dobishëm,” theksojnë ata, duke iu referuar raportimeve të The Independent.

Gjetjet e reja mbështeten nga studime të dekadës së fundit, që kanë vënë re se sheqernat e thjeshta mund të shkaktojnë inflamacion në trup, një proces që ndikon negativisht në qarkullimin e gjakut dhe shëndetin e skalpit.

Një kërkim i vitit 2023 nga Universiteti Tsinghua zbuloi se personat që konsumonin rreth 11 kënaçe pije të ëmbla në javë (rreth 3.5 litra) kishin rrezik dukshëm më të lartë për rënie flokësh. Sipas studiuesve, teprica e sheqerit nxit prodhimin e sebumit, një substancë yndyrore që, në sasi të mëdha, mund të krijojë kushte për shumimin e baktereve dhe inflamacion të skalpit.

“Ndërhyrjet në mënyrën e ushqyerjes mund të jenë thelbësore për parandalimin dhe menaxhimin e alopecisë, por nevojiten kërkime të tjera për të kuptuar më mirë këto mekanizma,” thuhet në raportin e studiuesve portugezë.

Ekspertët e Mayo Clinic theksojnë se alopecia androgjenetike — e njohur ndryshe si tullaci e trashëguar — është forma më e përhapur e humbjes së flokëve dhe mund të prekë si burrat, ashtu edhe gratë. Trajtimet përfshijnë përdorimin e medikamenteve si Propecia dhe Rogaine, ndërsa në disa raste flokët mund të rigjenerohen edhe pa ndërhyrje mjekësore.

Nga ana tjetër, marrja e mjaftueshme e vitaminës D dhe hekurit është treguar se ul ashpërsinë e rënies së flokëve dhe përmirëson dukshëm rritjen e tyre.