Një operacion i policisë kolumbiane për të arrestuar anëtarët e bandës famëkeqe “Tren de Aragua” ka përfunduar me një tragjedi.

Sipas mediave të huaja, Ender Alexis Rojas Montan, 31 vjeç, u rrëzua nga kati i tetë i një ndërtese teksa përpiqej t’i shpëtonte arrestimit. Ai tentoi të kalonte në një kat më poshtë, por humbi ekuilibrin dhe ra në trotuar, duke ndërruar jetë në vend.

Në apartamentin ku po fshihej, policia gjeti drogë me vlerë rreth 10 mijë dollarë dhe arrestoi tre anëtarë të tjerë të bandës, të gjithë shtetas venezuelianë.

Ndër të arrestuarit ishte edhe Cabeza Calderón, i njohur me nofkën “Toro”, një nga njerëzit më të afërt të udhëheqësit të organizatës kriminale, Héctor Guerrero Flores, i cili është në kërkim në Peru që prej vitit 2023 për zhvatje dhe trafik droge.

Operacioni është pjesë e një fushate të gjerë të autoriteteve kolumbiane për çmontimin e rrjeteve të “Tren de Aragua”, bandë që ka shtrirë aktivitetin kriminal në disa vende të Amerikës Latine.