Kryeministri Edi Rama ka reaguar për debatet dhe kundërshtimet që kanë shoqëruar reformën e propozuar administrativo-territoriale, pas protestave të disa përfaqësuesve vendorë dhe kritikave të shfaqura edhe brenda Partisë Socialiste.

Përmes një reagimi në platformën “X”, Rama e ka cilësuar normale fazën e konsultimit publik, duke theksuar se kundërshtimet janë pjesë e një procesi diskutimi që do të zgjasë 60 ditë.

Sipas kryeministrit, kjo periudhë është parashikuar pikërisht për t’u dhënë mundësi qytetarëve, institucioneve vendore dhe përfaqësuesve politikë të paraqesin mendimet dhe argumentet e tyre për ndryshimet e propozuara.

Rama është ndalur edhe te reagimet e kryetarëve të bashkive dhe këshillave bashkiakë, duke kujtuar se qëndrimet zyrtare duhet të shprehen përmes dokumenteve institucionale, ndërsa protestat paqësore janë pjesë e debatit publik.

Ai ka kundërshtuar interpretimet se debatet brenda Partisë Socialiste apo reagimet kundër reformës përbëjnë një problem politik për qeverinë, duke deklaruar se askush nuk do të pengohet të shprehë opinionin e tij.

Sipas Ramës, vendimi përfundimtar për reformën territoriale do të merret nga Kuvendi pas përfundimit të procesit të konsultimeve, ndërsa gjatë kësaj kohe palët do të kenë mundësi të paraqesin argumentet e tyre.

Kryeministri ka theksuar gjithashtu se në hartimin e ndarjes së re territoriale duhet të mbizotërojnë kriteret praktike dhe funksionale të administrimit, ndërsa elementë si historia e zonave, traditat apo simbolika lokale, sipas tij, nuk mund të jenë baza kryesore për një reformë të tillë.