Ashton Kutcher, 47 vjeç, ka folur hapur për ndikimin e pamjes së tij fizike në rrugëtimin e tij në Hollywood. Gjatë promovimit të serialit të tij të ri, The Beauty, në New York Comic Con, aktori pranoi se fiziku tërheqës shpesh i ka hapur disa dyer, por njëkohësisht i ka mbyllur të tjera.

“Ka role që i kam marrë për shkak të mënyrës si dukem, por edhe shumë të tjera që nuk i kam marrë për të njëjtën arsye,” tha Kutcher, duke shtuar se, ndonëse mund të duket një problem “i mirë”, për të ka qenë shpesh burim frustrimi.

Ai theksoi se industria e filmit është thellësisht vizuale dhe pamja fizike ndikon drejtpërdrejt në perceptimin e personazhit. “Kur përpiqesh të tregosh një histori me imazhe, mënyra se si dukesh luan rol kyç në atë që përçon personazhi,” u shpreh Kutcher.

Në serialin The Beauty, i bazuar në librat komikë të Jeremy Haun dhe Jason A. Hurley, Kutcher luan rolin e një miliarderi të teknologjisë në një botë ku përsosmëria fizike është e mundur, por me një kosto të frikshme. Aktori e përshkroi rolin si një nga përvojat më të pasura të karrierës së tij.