Komisioni Qendror i Zgjedhjeve (KQZ) njoftoi përmbylljen e procesit të numërimit dhe verifikimit në Qendrat Komunale të Numërimit për zgjedhjet lokale të 12 tetorit në Kosovë. Ndërkohë, për ditën e tretë me radhë, në Qendrën e Numërimit dhe Rezultateve po vazhdon numërimi i votave me postë nga qytetarët jashtë vendit.

Komunat e fundit ku përfundoi procesi ishin Prishtina, Prizreni, Gjilani dhe Malisheva. Sipas KQZ-së, janë verifikuar rezultatet për 2.571 vendvotime të rregullta, duke përfshirë votat për kryetarë dhe për kuvendet komunale, përkatësisht janë procesuar 5.142 kuti votimi që i përkasin dy llojeve të zgjedhjeve.

Numërimi i votave nga diaspora, që votuan nga 17 shtatori deri më 11 tetor, ka nisur më 17 tetor. Nga 33.841 pako të pranuara, pas verifikimit 29.636 u aprovuan dhe po procesohen aktualisht.

Pas përfundimit të numërimit të këtyre votave, KQZ-ja do të vazhdojë me votat me kusht dhe ato të personave me nevoja të veçanta, para se të shpallë rezultatet për raundin e parë të zgjedhjeve.

Sipas rezultateve fillestare, 21 komuna kanë zgjedhur kryetarët e tyre në raundin e parë, ndërsa në 17 komuna të tjera do të zhvillohet balotazhi më 9 nëntor. Në ditën e zgjedhjeve votuan 39,58% e mbi dy milionë qytetarëve me të drejtë vote brenda vendit.