Kamerieri i lokalit ku ndodhi ngjarja e rëndë në Manëz, ku mbetën të vrarë Aranit Kurti dhe Flori Paluçi, ka dhënë detaje mbi momentet që çuan në përplasjen fatale.
“Daniel Pepa dhe Araniti kanë ardhur në lokal rreth orës 01:00-01:30 dhe kanë kërkuar kafe. I thashë që s’ka kafe se ekspresi është fikur. Ai më tha se donte kafe patjetër, por i thashë që është fikur e s’bëhet në këtë orë,” – tregon kamerieri.
Ai shton se tensioni u rrit kur Flori Paluçi ndërhyri për të dalë në krah kamerierit, duke nisur një debat mes tij dhe Daniel Pepës:
“Ai u acarua dhe në këtë moment ndërhyri Flori, për të më dalë në krah dhe nisi debati mes tyre. Nga lokali dolën te dera e lokalit dhe Flori Paluçi qëlloi mbi Aranitin, shokun e Danielit, dhe Danieli më pas ka marrë armën dhe ka qëlluar mbi Florin duke e lënë të vrarë.”
Policia vazhdon kërkimet për Daniel Pepa, i cili dyshohet se ka qëlluar mbi Florin Paluçi, ndërsa grupi hetimor po punon për të zbardhur të gjitha rrethanat e ngjarjes.
