Një lajm i trishtë ka ardhur nga Kanadaja, ku mjeku shqiptar Agron Alija ka humbur jetën si pasojë e një aksidenti automobilistik.

Lajmi është konfirmuar nga Ambasada e Shqipërisë në Kanada, ndërsa ambasadorja Artemis Kosta Malo ka shprehur ngushëllimet më të sinqerta për familjen dhe të afërmit e të ndjerit.

Dr. Agron Alija shërbente si mjek dhe Profesor i Asociuar në Shkollën e Mjekësisë dhe Stomatologjisë “Schulich” në qytetin London, provinca Ontario.

Në një reagim publik, ambasadorja Malo e përshkroi atë si një figurë të shquar të komunitetit shqiptar në Kanada dhe një profesionist të përkushtuar:

“Me dhimbje të thellë mësuam lajmin tronditës për ndarjen e parakohshme nga jeta të Dr. Agron Alija. Në emër të Ambasadës së Republikës së Shqipërisë në Kanada dhe në emrin tim personal, shpreh ngushëllimet më të sinqerta familjes së Dr. Agron Alija për këtë humbje të pazëvendësueshme.”

“Dr. Alija ishte një figurë emblemë e komunitetit shqiptar në Kanada, një profesionist i përkushtuar në fushën e mjekësisë dhe një njeri me shpirt fisnik që kontribuoi me dashuri, përkushtim dhe integritet në shërbim të njerëzve dhe komunitetit, veçanërisht në Hamilton dhe London.”

Ambasadorja shtoi se humbja e tij ka lënë një boshllëk të madh jo vetëm për familjen, por edhe për të gjithë ata që e kanë njohur dhe vlerësuar për kontributin e tij.

“U prehsh në paqe, Dr. Alija. Kujtimi për ty do të qëndrojë përgjithmonë në zemrat dhe mendjet tona, me respekt, mirënjohje dhe mall të thellë për njeriun fisnik, mjekun e përkushtuar dhe mikun e dashur që ishe,” – përfundon mesazhi ngushëllues.