Një 29-vjeçare shqiptare, Savannah Kulla, është qëlluar për vdekje nga ish-bashkëshorti i saj, 38-vjeçari Anthony Deschepper, në Kanada, në një ngjarje tragjike që ka tronditur komunitetin shqiptar dhe vendas.

Sipas raportimeve të mediave kanadeze, ngjarja ndodhi të martën rreth orës 14:00, në parkingun e një qendre tregtare, ku policia gjeti trupin e pajetë të të resë. Savannah u shpall e vdekur në vendngjarje, ndërsa autori u vra më pas nga policia gjatë një përplasjeje të armatosur.

Nëna e saj, Karen Kulla, ka rrëfyer mes lotësh për mediat momentet e fundit të vajzës:

“Thjesht nuk mund ta besoj që ajo ka ikur. Ajo ishte kaq e bukur, e zgjuar dhe ne e donim shumë.”

Sipas dëshmisë së nënës, Savannah kishte shkuar të takonte ish-bashkëshortin për t’i dhënë mundësinë të kalonte pak kohë me vajzën e tyre 17-muajshe. Por gjatë takimit, pas një debati për një çantë me pelena, ai nxori armën dhe e qëlloi tre herë.

“Dëgjova që ai i tha: ‘Më duhet çanta e pelenave’, dhe ajo iu përgjigj: ‘Do ta marr unë’. Ai iu kthye: ‘E harrove çantën e mallkuar’, dhe më pas e qëlloi tre herë,” – rrëfeu Karen.

Nëna e 29-vjeçares shtoi se vajza e saj kishte frikë për jetën, duke i thënë vetëm një muaj më parë:

“Nëse qëndroj me të, ai do të më vrasë.”

Savannah ishte nënë e katër fëmijëve dhe ishte ndarë nga Deschepper prej disa muajsh. Ai kishte precedentë penalë dhe ishte në kërkim për sulme me armë që nga viti 2023.

Karen tregon gjithashtu se ish-partneri e kishte përndjekur vajzën e saj vazhdimisht, duke e telefonuar qindra herë në ditë:

“Ajo kishte ndryshuar numrin disa herë, por ai e gjente përsëri. Ndonjëherë ajo i përgjigjej vetëm për t’i thënë ‘më lër rehat’.”

Tragjedia e Savannah Kullës ka hapur një debat të gjerë në Kanada për dhunën ndaj grave dhe mungesën e mbrojtjes efektive për viktimat e përndjekjes dhe dhunës në marrëdhënie.