Kryeministri Edi Rama u shpreh i zhgënjyer për vonesat në zbatimin e paketës së re për tokën, duke kritikuar disa bashki që nuk kanë dërguar ende hartat e zonave prioritare të investimit.

“Vetë paketa pranoi se ka disa ngarkesa të tepërta burokratike. Kam kërkuar që të bëhen amendimet përkatëse në ligj, por kjo s’ka lidhje me vonesën tuaj. Ti, Kreshnik, çfarë të ka penguar të bësh hartën dhe ta dërgosh në qeveri? Nëse prisni përgjigje nga ASHK, s’e keni kuptuar ligjin,” tha Rama.

Ai theksoi se paketa është “ilaçi” për një plagë shumëvjeçare të qytetarëve që kanë tokën, por nuk kanë dokumentet ligjore. “Ligji 20/20 nuk dha rezultatin e pritshëm, ndaj ndërtuam këtë paketë që t’i japë mundësinë kujtdo të investojë në tokën e të parëve të vet,” shtoi kryeministri.

Rama sqaroi se procesi është i thjeshtë: qytetari shpreh interesin në bashki, dhe nëse toka nuk është e kontestuar, pas 45 ditësh mund të marrë një kontratë me qira simbolike “1 euro” për të nisur investimin.

Por, sipas tij, procesi ka ngecur në fazën më të lehtë – përcaktimin e zonave nga bashkitë. “Ajo që nuk kemi pritur është që procesi të ngecë aty ku është hapi juaj. Vetëm Përmeti, Skrapari, Elbasani, Belshi dhe Tropoja kanë sjellë hartat. Do ju lutesha të bëni përcaktimin e zonave,” u shpreh Rama.