Një ngjarje e rëndë është regjistruar në Institucionin e Ekzekutimit të Vendimeve Penale (IEVP) Shkodër, ku i paraburgosuri Brendon Ronald Saporito, 57 vjeç, është gjetur i varur në dhomën e tij nga bashkëvuajtësit në orët e mbrëmjes së 28 tetorit 2025.

Sipas njoftimit zyrtar, punonjësit e burgut kanë ndërhyrë menjëherë, duke e nxjerrë Saporiton nga dhoma me shenja jete dhe puls, ndërsa është transportuar me urgjencë drejt Spitalit të Koplikut, ku stafi mjekësor ka tentuar ta mbajë në jetë. Pavarësisht përpjekjeve të mjekëve, 57-vjeçari ka ndërruar jetë pak pas mbërritjes në spital.

Brendon Ronald Saporito, me shtetësi amerikane dhe datëlindje 22 prill 1968, ndodhej në paraburgim për veprën penale “Vrasje për shkak të marrëdhënieve familjare”, pas një vendimi të Gjykatës së Shkallës së Parë Shkodër që i kishte caktuar masën e sigurisë “arrest në burg”. Ai ishte arrestuar më 2 maj 2025 dhe ishte transferuar në IEVP Shkodër më 4 maj 2025.

Ngjarja është raportuar menjëherë te autoritetet kompetente, ndërsa Prokuroria e Shkodrës dhe Shërbimi i Kontrollit të Brendshëm në Burgje kanë nisur hetimet për zbardhjen e plotë të rrethanave.

Drejtoria e IEVP Shkodër njoftoi se po bashkëpunon ngushtë me organet hetimore për dokumentimin e shkaqeve që çuan në vdekjen e të paraburgosurit, ndërsa trupi i pajetë i është dërguar Mjekësisë Ligjore për ekspertizë.