Aktorja e njohur amerikane, Megan Fox, ka ndarë së fundmi një rrëfim të ndjerë për anët e errëta të famës, gjatë një shfaqjeje speciale të filmit kult “Jennifer’s Body”.

Fox kujtoi se periudha pas rolit të saj në filmin e vitit 2007 “Transformers” ishte një nga më të vështirat e jetës së saj. Sipas saj, suksesi i menjëhershëm erdhi me një çmim të lartë – presionin e medias dhe trajtimin shpesh mizor nga paparacët.

“Në atë pikë të jetës time isha shumë e zemëruar për mënyrën si më trajtuan në industrinë e filmit. Ishte e vështirë të përballesha me famën, madje edhe para se të fillonim xhirimet,” – tha ajo.

Aktorja tregoi edhe një episod që i ka mbetur në mendje nga premiera e filmit “Jennifer’s Body” në vitin 2009.

“Dola nga premiera për të shkuar në një tjetër event, dhe paparacët ishin vërtet të pamëshirshëm. Njëri prej tyre më pyeti: ‘Megan, a mendon se je e mbivlerësuar?’ Unë thjesht po përpiqesha të bëja punën time,” – kujtoi ajo me trishtim.

Sipas Fox, vitet e para të karrierës ishin shoqëruar me pasiguri, presion të madh dhe mungesë mirëkuptimi, çka e bëri të ndjehej e humbur dhe e zemëruar.

“Mendoj se u traumatizova nga fama. Isha vetëm 19 vjeç kur bëra filmin tim të parë të madh dhe ndjeva sikur ai rol pasqyronte të gjitha energjitë që ekzistonin brenda meje. Ishte diçka shëruese, sepse më lejoi të shprehja një anë të errët femërore që askush nuk donte ta pranonte,” – tha aktorja.

Megan Fox, e cila sot është 38 vjeç dhe nënë e tre fëmijëve, ka folur shpesh për përvojat e saj të vështira në Hollywood, duke u bërë një zë i fortë për gratë që përballen me seksizëm dhe gjykim publik në industrinë e filmit.