Një ngjarje e rëndë ka tronditur Castelnuovo Del Garda, pranë Veronës në Itali, ku një burrë 41-vjeçar, me origjinë braziliane, Douglas Reis Pedroso, vrau ish-të dashurën e tij, Jessica Strapacciolo Custodio De Lima, 33 vjeçe, gjithashtu braziliane, duke e goditur me një numër të papërcaktuar plagësh me thikë.

Pas krimit, Pedroso telefonoi karabinierët duke thënë se kishte ndërmend të kryente vetëvrasje. Trupi i viktimës u gjet pas disa orësh në apartamentin ku jetonte, ndërsa thika e përdorur u gjet në makinën e autorit.

Autoritetet bënë me dije se në të kaluarën 33-vjeçarja kishte denoncuar sjelljen dhunshme të partnerit të saj, por më pas kishte tërhequr ankesën. Prillin e kaluar, Pedroso kishte marrë një urdhër gjykate kufizues, që e ndalonte të afrohej brenda 500 metrave nga shtëpia dhe vendi i punës i ish-partneres së tij dhe e detyronte të mbante byzylyk elektronik për monitorim.

Megjithatë, gjatë arrestimit të tij dje, karabinierët konstatuan se Pedroso nuk e mbante byzylykun, i cili ende nuk është gjetur. Ngjarja ngre shqetësime serioze mbi efektivitetin e masave kufizuese për parandalimin e dhunës në familje.