Kompania fintech shqiptare T-Blocks, e themeluar nga Eni Shtini dhe Henri Ndreca, ka njoftuar bashkëpunimin me firmën amerikane të blockchain-it Ripple, për të lansuar tokenizimin e aseteve të botës reale në bursën XRPL të Ripple.

Sipas marrëveshjes, T-Blocks do të dixhitalizojë rreth 50 milionë euro (58.3 milionë dollarë) asete nga fondi i saj me seli në Luksemburg, duke i mundësuar investitorëve të tregtojnë ato në mënyrë online.

“Duke filluar me Shqipërinë dhe Ballkanin, platforma me seli në Luksemburg do të tokenizojë mundësi me rritje të lartë në pasuri të paluajtshme, mikpritje dhe energji të rinovueshme, duke mundësuar akses të sigurt dhe në përputhje me rregullat për investitorët globalë,” – njoftoi T-Blocks.

E themeluar në Shqipëri në vitin 2023, kompania ka selinë tani në Luksemburg dhe më herët këtë vit lançoi një fond investimi për investitorët e diasporës që synojnë pasuri të paluajtshme dhe energji të gjelbër në Ballkanin Perëndimor.

Ripple, me bazë në SHBA, zotëron XRPL, një platformë tregtimi kriptomonedhash që ofron edhe pagesa ndërkombëtare me shpejtësi dhe kosto më të ulëta se sistemi tradicional Swift. Aktualisht, XRPL ka një kapitalizim tregu prej 160 miliardë dollarësh, por ekspertët presin rritje të ndjeshme në të ardhmen.

Tokenizimi i aseteve reale (RWA) është procesi i konvertimit të të drejtave të pronësisë së një aseti financiar, fizik ose tradicional në një token dixhital në blockchain. Ky proces mbush hendekun midis financave tradicionale dhe DeFi, duke sjellë asete historikisht jolikuide në ekonominë dixhitale.

RWA-të mund të përfaqësojnë pasuri të paluajtshme, obligacione, mallra si ari, kredi private dhe vepra arti. Tokenizimi i një apartamenti lejon disa investitorë të bëhen pronarë pjesërisht, edhe nëse nuk kanë mundësi të blejnë pronën plotësisht. Ekspertët e financave e konsiderojnë këtë proces si “gjeneratën e ardhshme të tregjeve”.