Një i ri shqiptar, Gerald Cera, është dënuar me gjashtë vite burg në Mbretërinë e Bashkuar, pasi u shpall fajtor për pjesëmarrje në një konspiracion për emigrim të paligjshëm.
Ai kishte pretenduar se ishte babai i tetë foshnjave shqiptare, me qëllim që t’u siguronte atyre shtetësi britanike përmes aplikimeve për pasaportë. Mashtrimi u zhvillua midis shtatorit 2022 dhe gushtit 2024, ku Cera përdori dokumentet e tij personale, përfshirë pasaportën britanike dhe certifikatën e natyralizimit, për të mbështetur aplikimet.
Prokurorët zbuluan se mashtrimi përfshinte fotografi të inskenuara të shqiptarëve me foshnjat dhe nënat e tyre, dhe juria u bind se Cera nuk ishte babi biologjik i asnjë prej foshnjave.
“Duke kërkuar në mënyrë të rreme shtetësinë britanike për ata që nuk kanë të drejtë, Cera minoi sistemin tonë të emigracionit dhe ata që përpiqen të vijnë në mënyrë të ligjshme,” – deklaroi prokurorja Roma Karampatsi.
Ministri britanik për Sigurinë Kufitare dhe Azilin, Alex Norris, theksoi:
“Ne nuk do të qëndrojmë duarkryq ndërsa bandat kriminale abuzojnë me sistemin tonë të emigracionit duke shfrytëzuar fëmijët për të bërë para të shpejta.”
Hetimi zbuloi gjithashtu një lidhje mes Cerës dhe një tjetri shqiptar, i cili kishte shpallur se ishte babai i 13 fëmijëve shqiptarë për aplikime pasaporte. Si pasojë e dënimit, Ministria e Brendshme britanike i hoqi shtetësinë Cerës, ndërsa pasaportat e të gjithë fëmijëve të përfshirë janë revokuar.
