Presidenti i Serbisë, Aleksandar Vuçiq, ka reaguar të mërkurën pas akuzave se qëndronte pas incidenteve ndaj emigrantëve turq në Mal të Zi, duke theksuar se nuk kishte dijeni për ngjarjet.

Incidentet filluan më 26 tetor pas një përleshjeje në Podgoricë, ku u plagos një banor, dhe më pas ndodhën sulme ndaj shtetasve turq dhe pronës së tyre. Protesta masive në rrugët e kryeqytetit me mesazhin “turqit duhet të dëbohen nga Mali i Zi” tensionuan më tej situatën.

Qeveria malazeze, e cila ka në përbërje edhe parti të afërta me Beogradin, vendosi regjim vizash për shtetasit turq. Akuzat ndaj Vuçiqit u ngritën nga figura publike si kryetari i Partisë Socialdemokrate të Malit të Zi, Ivan Vujoviq, dhe shkrimtari Andrej Nikolaidis, që pretenduan se trazirat kishin “firmën e qartë të presidentit serb”.

Vuçiq i mohoi akuzat, duke i cilësuar ato si përpjekje për të shpërqendruar publikun dhe për të nxitur urrejtje ndaj serbëve. “Ata duhet të krijojnë një agjendë të re, sepse nuk dinë çfarë të ofrojnë përveç urrejtjes ndaj çdo gjeje serbe”, tha ai.

Reagime të ashpra vijnë edhe nga partitë opozitare dhe komuniteti ndërkombëtar, që e konsiderojnë aktin e vendosjes së regjimit të vizave për turqit si të rrezikshëm dhe ksenofobik, ndërsa udhëheqës të komunitetit islam lokal vunë në dukje lidhjet e ngushta midis pjesës së koalicionit qeverisës dhe Beogradit.

Tensionet vijnë në një kohë kur marrëdhëniet mes Beogradit dhe Ankarasë po përjetojnë ftohje për shkak të furnizimeve të dronëve të Turqisë drejt Kosovës, duke komplikuar më tej situatën rajonale.