Presidenti serb, Aleksandar Vuçiç, ka bërë thirrje ndaj Shteteve të Bashkuara për të dhënë më shumë kohë në adresimin e çështjeve që lidhen me rafinerinë e vetme të naftës në Serbi, e cila kontrollohet pjesërisht nga gjigandi rus i energjisë, Gazprom, raportoi Bloomberg të mërkurën.

Më herët këtë muaj, Shtëpia e Bardhë aktivizoi kufizime që synonin NIS (Industria e Naftës e Serbisë), veprim që shtyu Kroacinë të pezullonte furnizimet me naftë bruto dhe rriti rrezikun e mbylljes së rafinerisë. Sanksionet goditën gjithashtu stacionet e benzinës të operuara nga NIS, të cilat nuk mund të pranojnë më kartat American Express, Mastercard dhe Visa.

“Shpresoj që SHBA-të të mos fillojnë sanksione dytësore të paktën deri në mesin e dhjetorit”, tha Vuçiç për Bloomberg, duke shtuar se Beogradi shpreson të zgjidhë çështjen lidhur me aksionet shumicë të Gazprom në NIS. Ai gjithashtu i kërkoi zyrtarëve amerikanë të përmbahen nga çdo synim ndaj institucioneve financiare serbe që lehtësojnë pagesat në stacionet e rafinerisë.

NIS është një kompani kryesore energjetike në Ballkan, me një rafineri në Pançevo, pranë Beogradit, dhe një rrjet prej mbi 400 stacionesh benzine. Aksionerët kryesorë janë: Gazprom Neft me 44.85%, Gazprom me 11.3% dhe shteti serb me 29.87%.

Shtetet e Bashkuara presin që Beogradi ose të sigurojë shitjen e aksioneve të Gazprom në NIS, ose të marrë kontrollin përmes shtetëzimit. Vuçiç më herët këtë javë hodhi poshtë planet për veprime të njëanshme kundër gjigantit rus, duke theksuar se Gazprom nuk është “as komunist dhe as fashist”.