Tsunami, qeni i racës Border Collie që mori pjesë në operacionet e kërkim-shpëtimit pas tërmeteve të fuqishme që goditën Venezuelën më 24 qershor, është nderuar me një statujë në qytetin e Maracaibos.

Statuja u zbulua në parkun “Vereda del Lago”, gjatë një ceremonie ku Tsunami ishte i pranishëm së bashku me trajnerin e tij, Jorge Beens.

Qeni u nderua gjithashtu me “Medaljen e Trimërisë” nga shërbimi zjarrfikës i Maracaibos, në vlerësim të rolit të tij në operacionet e kërkim-shpëtimit.

Tsunami mori pjesë në kërkimet në zonat e prekura nga tërmetet, veçanërisht në La Guaira, ku ndihmoi ekipet e shpëtimit të lokalizonin persona që dyshohej se ndodheshin nën rrënoja.

Burime të ndryshme raportojnë se qeni ndihmoi në gjetjen e dhjetëra personave gjatë operacioneve të kërkim-shpëtimit.

Emri i Tsunamit, tashmë i lidhur me operacionet e shpëtimit, mori një kuptim simbolik pas katastrofës që goditi vendin.

Ceremonia në Maracaibo u shndërrua kështu në një homazh jo vetëm për Tsunamin, por edhe për qentë e kërkim-shpëtimit dhe ekipet që morën pjesë në operacionet pas tërmeteve.