Ish-kryetari i Kuvendit dhe një nga bashkëpunëtorët më të afërt të Fatos Nanos, Gramoz Ruçi, i ka dhënë sot lamtumirën e fundit liderit historik të Partisë Socialiste, i cili u nda nga jeta dy ditë më parë.

Në një prononcim për mediat nga homazhet në Pallatin e Kongreseve, Ruçi theksoi se Nano do të mbetet në kujtesën e shqiptarëve si i pari politikan i persekutuar në demokraci, me 4 vite burg, dhe si themeluesi që transformoi Partinë Socialiste në një forcë moderne dhe evropiane.

“Sot është dita që të nderojmë dhe të përkujtojmë Fatos Nanon — si themelues, si reformues dhe demokratizues i Partisë Socialiste. Ai ishte lider për 14 vite, ku 4 prej tyre i kaloi në izolim dhe 8 vite mbajti forcën politike në pushtet. Një arritje që nuk ka ndodhur në asnjë vend tjetër të Europës,” – deklaroi Ruçi.

Ai shtoi se Nano do të kujtohet si një politikan race dhe qytetar ekselent, që i hapi rrugë brezit të ri politik.

“Do të mbahet mend si i pari që, pas zgjedhjeve që humbi, dha dorëheqjen e parevokueshme, duke i lënë hapësirë gjeneratës së re për të marrë drejtimin. I hapi rrugën dy djemve të rinj socialistë, 30-vjeçarë, që të bëheshin kryeministra,” – u shpreh Ruçi.

Në fund, ai e përmbylli mesazhin e tij me tone emocionale:

“I paharruar kujtimi i vëllait tim, Fatos Nano. Sot e nderojnë përfaqësues nga Shqipëria dhe bashkëkombësit tanë. Ai do të mbetet një figurë e pashlyeshme në historinë e shtetformimit dhe të socializmit shqiptar.”