Momente të thella emocionale janë regjistruar sot në Pallatin e Kongreseve, gjatë homazheve në nder të ish-kryeministrit dhe ish-liderit të Partisë Socialiste, Fatos Nano.

Bashkëshortja e tij, Xhoana Nano, nuk mundi të përmbante emocionet dhe lotët teksa qëndronte pranë arkivolit të të shoqit, duke prekur zemrat e të pranishmëve. Në krah të saj ishte djali i çiftit, Sokoli, i cili shfaqej i përmbajtur, ndërsa përkrah tyre ndodheshin familjarë, miq dhe bashkëpunëtorë të afërt të Nanos.

Pamjet nga ceremonia tregojnë dhimbjen e madhe të familjes për humbjen e një prej figurave më të rëndësishme të politikës shqiptare pas viteve ’90.

Qytetarë të shumtë, përfaqësues të lartë të Partisë Socialiste, opozitës dhe institucioneve shtetërore, kanë bërë homazhe për të nderuar jetën dhe kontributin politik të Fatos Nanos, njeriut që shënoi një epokë në historinë moderne të Shqipërisë.