Ukraina është goditur sërish nga një valë e re sulmesh ajrore ruse gjatë natës, që kanë shkaktuar dëme të mëdha dhe viktima në disa rajone të vendit.

Sipas autoriteteve ukrainase, rreth 60 mijë persona kanë mbetur pa energji elektrike në rajonin e Zaporizhias, ndërsa dy persona janë vrarë në Odesë pas një sulmi me dronë rusë.

Kjo e çon numrin e viktimave në gjashtë brenda 24 orëve, mes tyre dy fëmijë të moshës 11 dhe 14 vjeç, të cilët humbën jetën në rajonin e Dnipropetrovsk, pas një sulmi ajror që shkaktoi zjarr në një dyqan.

Guvernatori i Zaporizhias, Ivan Fedorov, tha se 800 sulme ruse kanë goditur 18 vendbanime në provincë gjatë ditës së fundit, duke lënë një të vdekur dhe tre të plagosur, ndërsa dëmet në infrastrukturë janë “të konsiderueshme”.

“Kompanitë e energjisë po punojnë për të rivendosur furnizimin sapo të lejojnë kushtet e sigurisë,” shkroi Fedorov në Telegram, duke ndarë foto të ndërtesave me fasada të rrënuara.

Ndërkohë, në Odesë, dy persona humbën jetën pasi një dron rus goditi një zonë banimi pranë bregdetit të Detit të Zi.

Zaporizhia, një prej rajoneve më të goditura të Ukrainës që prej fillimit të luftës, vazhdon të jetë çdo ditë nën zjarrin e raketave dhe dronëve rusë, duke shkaktuar shkatërrime të shumta në shtëpi, rrugë dhe objekte publike.

Autoritetet ukrainase paralajmërojnë se Rusia ka shtuar ndjeshëm intensitetin e sulmeve ndaj infrastrukturës energjetike, duke synuar ta lërë vendin në errësirë në prag të dimrit.