Kanë kaluar dy vite që kur Klaudio Myrtaj u gjet i vdekur në një garazh në Vernante, Itali. 34-vjeçari shqiptar, i vendosur prej vitesh në Itali, ishte i njohur në fshatin e vogël në Val Vermenagna, dhe vdekja e tij solli shumë reagime. Fillimisht u fol për një vrasje, dhe nuk u përjashtua mundësia e një krimi të lidhur me drogën ose ndonjë krim pasioni.

Por për Prokurorinë, e cila kërkoi mbylljen e çështjes, veprimi i Klaudios ishte vetëvrasje.

Mediat italiane shkruajnë se familja Myrtaj ka qenë kundër këtij rindërtimi për dy vjet dhe gjyqtari i hetimeve paraprake ende nuk ka dhënë fjalën përfundimtare, duke pasur mundësinë të urdhërojë prokurorin për hetime të mëtejshme ose të konfirmojë mbylljen e çështjes.

Ishte pasdite e së shtunës, 4 nëntor 2023, kur trupi i vdekur i të riut shqiptar u gjet në punishten e zdrukthtarisë në qytetin e muraleve të Pinocchio-s, në Via Umberto Primo, disa hapa larg Bashkisë. Ai vdiq disa orë më vonë në spitalin e Cuneo-s.

Nga autopsia rezultoi se ai kishte një plagë plumbi në bark, nga një pistoletë kalibri .22. Megjithatë, familja dhe e dashura e tij nuk pranojnë pistën e vetëvrasjes, duke e përjashtuar këtë mundësi.

“Do të ishte i vetmi rast vetëvrasjeje në të cilin nuk u gjet arma,” pohon avokati Alessandro Parola, që përfaqëson ish-partneren e viktimës.

Në fakt, arma u gjet vetëm pak ditë më vonë, në një sirtar të punishtes së një të moshuari, ku Klaudio punonte herë pas here. Zejtari i moshuar nuk e raportoi posedimin e armës, por më pas u detyrua të pranonte: “Po, kam pasur një armë.”

Avokatët, përfshirë Parolën dhe Federico Frenin, që përfaqëson familjen Myrtaj, shprehin dyshime:

“Ajo që është e sigurt është se arma është lëvizur. Por pse? Dhe nga kush? Kushdo që e ka zhvendosur ka pasur motiv, dhe ai motiv mund të lidhet pikërisht me vrasjen e Klaudios.”

Hipoteza e Prokurorisë është se personi që e lëvizi armën kishte frikë, duke u shqetësuar për hetime të mundshme për vrasje ose pasojat e saj. Megjithatë, nuk janë lëshuar urdhër-arreste, dhe askush nuk është nën hetim për vdekjen e Klaudios.

Vendosja e armës përsëri në sirtar disa ditë më vonë mund të ishte një mënyrë për të mashtruar hetuesit dhe për ta bërë të duket si vetëvrasje.

Familja Myrtaj vazhdon “luftën” me autoritetet për të zbuluar të vërtetën pas vdekjes misterioze të djalit të tyre, duke kërkuar që çdo dyshim për një vrasje të mos mbetet i pazgjidhur.