Durrës – Një punonjës policie është arrestuar nga Agjencia e Mbikëqyrjes Policore (AMP) me akuzën e korrupsionit pasiv, pasi dyshohet se i ka kërkuar një shtetasi një shumë prej 60 mijë lekësh për të nxjerrë automjetin nga pika e bllokimit dhe për të mos i vendosur gjobë.

Sipas njoftimit zyrtar të AMP, arrestimi i punonjësit të policisë me iniciale G.H., i cili shërbente në Trafikun Urban dhe Interurban të DVP Durrës, u realizua në flagrancë në bashkëpunim me SPAK, përmes veprimeve me metoda speciale të hetimit. Paratë e kërkuara përveçse u sekuestruan, u dokumentuan edhe përmes pamjeve nga operacioni.

“Punonjësi i policisë, duke shfrytëzuar funksionin e tij, i kërkoi dhe i mori shtetasit E.S. një shumë prej 60 mijë lekësh, duke premtuar se do të nxirrte mjetin nga pika e bllokimit dhe nuk do të vendoste masën administrative,” thuhet në njoftimin e AMP.

Agjencia njofton se veprimet hetimore vazhdojnë për të verifikuar përfshirjen e mundshme të personave të tjerë në këtë aktivitet kriminal. AMP rikujton qytetarët të denoncojnë çdo rast të abuzimit apo shkeljes së ligjit nga punonjësit e strukturave përkatëse, duke përdorur numrin e gjelbër 0800 9090 ose adresën e emailit [email protected].