Kreu i Prokurorisë së Posaçme (SPAK), Altin Dumani, ka rrëzuar plotësisht akuzat e ish-kryeministrit Sali Berisha, i cili pretendonte se Dumani kishte intimiduar prokurorin Dritan Prençin, për të mos vijuar hetimet ndaj zëvendëskryeministres Belinda Balluku, e akuzuar për shkelje të barazisë në tenderin e tunelit të Llogarasë.

Në një intervistë në emisionin “Trialog” me Alba Alishanin në RTSH 1, Dumani theksoi se prokurorët e posaçëm janë “Zot” të çështjeve të tyre, duke shtuar se puna e tyre nuk mund të diktohet, devijohet apo manipulohet. Ai siguroi se prokurori Prençi nuk ka shprehur asnjë shqetësim lidhur me çështjen e Ballukut.

“Prokurorët e posaçëm janë të pavarur, janë zot të çështjes. Si drejtues i SPAK, kam ofruar gjithmonë mbështetjen dhe solidaritetin tim për prokurorin e çështjes, sa herë ka qenë e nevojshme. Në rastin konkret asgjë nuk qëndron, nuk është e vërtetë. Prokurori Prençi ka mbështetjen time për këtë çështje dhe të tjerat,” – deklaroi Dumani.

Ai shtoi se njoftimi publik i SPAK më 31 tetor, lidhur me paraqitjen e Ballukut në prokurori, ishte konform çdo ligji dhe procedurash, duke respektuar të drejtat e subjektit të akuzuar dhe integritetin e hetimit.

“Sa i takon informimit të publikut lidhur me çështjet në hetim, ne jemi gjithmonë të kujdesshëm. Njoftimi u bë ditën që subjekti u paraqit në prokurori dhe ishte korrekt nga ana procedurale dhe i mjaftueshëm për publikun,” – shtoi kreu i SPAK.

Deklaratat e Dumanit vijnë në një moment kur marrëdhëniet mes ekzekutivit dhe SPAK-ut janë në qendër të vëmendjes publike, pas hetimeve që prekin strukturat e larta të administratës dhe politikës.